Embætti sérstaks saksóknara

Embætti sérstaks saksóknara var stofnað með lögum nr. 135/2008 sem samþykkt voru á Alþingi 10. desember 2008. Embættinu var komið á fót til að rannsaka grun um refsiverða háttsemi í aðdraganda, tengslum við og í kjölfar atburða er leiddu til bankahrunsins, hvort sem grunur tengist starfsemi fjármálafyrirtækja, annarra lögaðila eða einstaklinga. Eftir atvikum skal sérstakur saksóknari fylgja eftir rannsókn með saksókn.

Rannsóknar- og ákæruheimildir embættisins taka meðal annars til efnahags,- auðgunar- og skattabrota, þar með talin brot sem rannsökuð hafa verið af skattrannsóknarstjóra ríkisins, Samkeppniseftirlitinu eða Fjármálaeftirlitinu og sem þær stofnanir hafa kært til lögreglu.

Kærum og ábendingum vegna gruns um refsiverða háttsemi sem fellur undir lög þessi skal beina til embættisins frá og með stofnun þess.

Í lögunum er sérstaklega kveðið á um að hinn sérstaki saksóknari hafi eftir þörfum samstarf við skattrannsóknarstjóra ríkisins, Fjármálaeftirlitið, Samkeppniseftirlitið og aðrar réttarvörslu- og eftirlitsstofnanir. Sé þess óskað skulu þessar stofnanir veita hinum sérstaka saksóknara upplýsingar um stöðu mála sem þær hafa til meðferðar til að tryggja sem kostur er vandaðan undirbúning opinberrar málsmeðferðar.

Með bréfi dóms- og kirkjumálaráðherra þann 13. janúar 2009 var Ólafur Þór Hauksson sýslumaður á  Akranesi skipaður í stöðu sérstaks saksóknara  frá og með 1. febrúar sama ár þar til embættið  verður lagt niður eða sameinað annarri ríkisstofnun.

Skrifstofa embættis sérstaks saksóknara er á Skúlagötu 17 í Reykjavík.